上海老底子每天呈送精彩文章一组

打开尘封的记忆，寻觅往昔的岁月

叙上海老底子事忆上海老底子人

诉上海老底子情

食尚往来说旧事

（上）

作者：杨忠明

沪语改写：郭莉

朗读：王浩峰

审阅、推荐：丁迪蒙

编辑：王乙其

记得小辰光勒小学里读书，有个同学带来一包山芋干，是用爆炒米花个办法爆出来个。大家侪伸出手去喊：“哈点来！”迭个是当时小学生用语，“哈”是动词，意思是拨我一眼。我当然也伸出手去，弄到两片又香又脆个山芋干。过仔几日天，我买了包咸老卜干，勒一片“哈点来”个叫声里向，侬一根我一根，一记头侪夯光。迭个就是阿拉小辰光，小囡之间个“食尚往来”。

勒伊个食品匮乏，居住条件赛过七十二家房客个年代里，东家邻居包馄饨，要搭每家端一碗过去；西家邻居过生日，一碗碗热气腾腾大排面又要分送到每家每户；楼下邻居乡下头亲眷带来一大捆甜芦粟，一只号头里所有个小囡围勒一筑堆，穷吃阿二头，吃得手节头也划破脱了，还是开心得勿得了——迭个也是从前个美好记忆。

现代文明社会，邻里之间食尚往来个渠道，已经拨防盗门、防盗窗个铁栅栏搭仔警惕个目光一刀斩断，甚至有人勒一幢楼里向住了十多年，竟然连得隔壁邻舍姓啥也勿晓得！

“雅集”，就是风雅个聚会。从前辰光，文人常庄会得勒勒文友屋里、茶馆酒楼里小聚，也有人叫“饭局”，迭个是吃个文化，小圈子文化。有眼难以开口个问题，倒可以勒饭局浪轻松解决。用现在个时髦用词来讲，就叫“食尚往来”。葛末，从前沪上文人雅集，欢喜寻眼啥个菜馆？点眼啥个小菜？酒茶之间，伊拉又会得搞眼啥个活动？其中又有眼啥个佚闻趣事呢？

呶，侬听我搭侬一样一样讲过来。

我曾经听沪上国学大家陆澹安先生讲起，从前上海文人商谈事务，有个欢喜到老正兴、德兴馆、同和馆等本帮菜馆，陆先生顶欢喜点个是白斩鸡、炒腰花、炒三鲜、腌笃鲜唠啥。伊记得从前菜市路，也就是现在个顺昌路浪个“老合记”，用猪脑子搭仔白果，烧出一只“金银双脑”，邪气肥美。伊常庄跟老报人严独鹤，及施济群、郑逸梅、朱大可等一班好朋友，勒菜馆里谈国学、论艺术，老酒吃到有眼醉熏熏了再散场，迭个算是顶顶写意个。澹安老人告诉我，伊曾经跟朋友勒勒上海一家东北酒家，吃过煠得邪气酥烂个大兴安岭熊掌，汤汁邪气粘稠，味道就像香港茶餐厅里个大鲍鱼，有股怪味道，尝一尝倒也呒没啥好吃。

沪上文史掌故大家郑逸梅先生，只要一讲起苏州星社个活动，真是邪气留恋过去个好时光。伊讲，从前星社每个号头侪要聚餐一次，参加个有陶冷月、徐碧波、程小青、蒋吟秋等文化名人。有一趟，大家享用个是太湖船菜，拿船开到黄天荡，一路浪向是惠风和畅，看水乡野色，帆影点点，移舟过去侪是美景；船舱里向有湖鲜，有时鲜蔬菜果品，还有米酒、点心咾啥，一船个人大快朵颐，吟诗谈笑，直到红日西沉，暮色四合，芦荡宿禽鸣声中，小船再开始返归。

老上海中医名家陈存仁，记录了民国辰光伊第一趟勒法大马路鸿运楼菜馆，摆饭局邀请上海名医，享用了一般个美味佳肴之外，又加了款“白汁排翅”，为此还多用脱四块银洋钿。陈老先生讲：当时上海个名医一个个应邀来到，有个北京首富叫乐笃周个大户，送拨每位来宾吉林人参一两，当时个价钿银洋钿十二块。酒醉饭饱之后，伊还准备了印度上品烟土招待贵客，一片吞云吐雾谈笑风生中，宾客业务敲定，直到深夜大家再散场回去。

作者：杨忠明

朗读：王浩峰

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年出版社

《实用沪语》复旦大学出版社

《上海话绕口令》少儿出版社

《上海方言词语使用手册》上海教育出版社

《上海话读成语故事》少儿出版社

《囡囡学童谣》，少儿出版社。

来源：“海上梦叠”
转载请注明原文网址：http://www.shunchangzx.com/scxms/11938.html